BUTUAN CITY – Nagduso og position paper ngadto kang Pangulong Rodrigo Duterte ang National Liga Board of Directors sa Philippine League of Barangay Captains aron irekonsidera niini ang kamanduang magpadakop sa mga barangay kapitan nga dili makabadlong sa mga health protocol violators sa ilang lugar.

Sa eksklusibong pakighinabi sa Bombo Radyo Butuan, gipadayag ni Butuan City Association of Barangay Captains kon ABC Federation President ug Baan Km.3 Brgy. Kapitan Gemma Tabada, nga kini ang nakab-ot nilang 21 ka mga membro sa board atol sa ilang tigom niadtong Martes.

-- Advertising --

Tumong niini nga magpagawas ang pangulo og sumbanan kon guidelines nga maoy ilang basehan human nga dili matud pa klaro ang mandato nga gipagawas ni Pangulong Duterte.

Pinaagi matud pa sa guidelines, naklaruhan sila sa mga grounds unya nga mahimo silang makasuhan og dereliction of duty kung duna’y mga super-spreader events sa ilang area of jurisdiction nga dili nila mabadlong.

Gidugang ni Kapitan Tabada nga silang mga barangay kapitan, dili makapugong sa pagkaylap sa COVID-19 tungod kay dili nila mapugngan ang mga tawong magsulod-gawas ning siyudad ilabina kadtong gikan sa mga lugar nga duna’y taas nga kaso usab sa coronavirus.

Sama matud pa sa mga taga-Butuan nga atua sa laing lugar o nasud nga gustong mu-uli nga kung dili nila tugutan, mahimong sila ang makasuhan.

Tungod niini, iyang gimanduan ang tanang mga opisyal sa 86 ka mga barangay ning siyudad aron i-mobilize na ang lang Barangay Emergency Health Response Teams kon BHERTs ug masigurong sila usab, luwas gikan sa makamatay nga coronavirus.