BUTUAN CITY – Padayong gitutukan sa lokal nga kagamhanan sa dakbayan sa Butuan ang mental health programs alang sa mga Butuanons sa ingon matabangan ang mga indibdiwal nga duna’y mental health problem nga makalingkawas gikan niini.
Sa eksklusibong pakighinabi sa Bombo Radyo Butuan, gibutyag ni Butuan City Councilor Eduardo Gonzales nga duna na’y ordinansa ang city government nga nagmugna og guidelines alang sa pagtutok sa mental health program.
Ang ingon niini nga programa, gitahas ngadto sa Committee on Family, Women and Children’s Welfare sa Sangguniang Panlungsod nga gipangunahan ni Konsehal Cherry Mae Busa.
Kini tungod na usab sa nagkadaghang ihap na sa mga indibidwal nga nagkutlo sa ilang kaugalingong kinabuhi tungod sa mental health problems nga napasamot pa dihang gipatuman ang isolation, duha ka tuig na ang nakalabay tungod sa COVID-19 pandemic.
Gani, apil sa gitahasan ilawom sa maong ordinansa ang Butuan Medical Center aron magpili og usa ka lugar nga maoy venue alang sa pagtambal sa pasyenteng naghambin sa maong problema.
