BUTUAN CITY – Gikumpirma sa militar nga napatay sa enkwentro ang magti-ayong rebelde nga high-ranking official ug medic didto sa Purok Amerika Barangay Sta. Maria, Trento, Agusan del Sur.

Sa pakighinabi sa Bombo Radyo Butuan, gi-ila ni LCol Louie Dema-ala, Commanding Officer sa 67th Infantry (AGILA) Battalion Philippine Army ang mga napatay nga sila  Danny Huit, alias Bosyong, secretary sa nagkahuyang nga Guerilla Front North sa the Sub-Regional Command 1, Southern Mindanao Regional Committee, ug ang asawa niining si Naneth Catalino, alias Bam-bam usa ka medic.

-- Advertising --

Sumala ni Lt. Dema-ala, atol sa pagpatrolya sa tropa sa maong lugar adunay nagtimbreng  residente nga adunay armadong tawo sa nasangpit nga lugar.

Gilayon kining girespondihan ug pag-abot sa lugar gipabuthan ang operating troops hinungdan usab sa pagbalos sa mga niini nga miresulta kamatayon sa maong magti-ayong rebelde ug nakuha sa enconter site ang usa ka caliber .45 pistola ug mga basiyo sa bala sa nagkadaiyang armas.

Sumala sa opisyal huyang na  kaayo Guerilla Front North human ang sunod-sunod nga engkwentro adtong nakalabay nga tuig ingon man pag-surrender sa ubang meimbro niini.

Nagtuo ang  opisyal nga mas muhinay pa ang maong grupo human ang kamatayon sa maong magti-ayon.

Sa pagkakaron, upat na lang matod pa ang meimbro sa  Guerilla Front North kinsa padayon pang gipangita sa tropa.