BUTUAN CITY – Padayon pang gipakisayran sa kapulisan sa Buenavista, Agusan del Norte kung duna’y foul play ang pagkamatay sa usa ka 85-anyos nga lolo kinsa napalgan na lang nga wala na’y kinabuhi kaganinang buntag sa may sabang nga bahin sa Purok 8, Sitio Tinago, Brgy. Matabao sakop sa maong lungsod.

 

Naila ang biktimang si Amado Tanso, residente sa Purok Santol, Brgy. 6 sa susamang lungsod.

 

Sigon ni PO2 Ricafort Gilbuena, migawas sa ilang imbestigasyon nga nakit-an pa sa pipila ka mga residente ang biktima nga didto naglakaw-lakaw sa tumoy sa baybay rason nga ila kining gihatod sa kalsada og wala na nila masayri nga mibalik diay kini sa baybay tungod sa pagpangita matud pa sa iyang igsoong si Nilo og anak nga si Sally Tanso.

-- Advertisement --

 

Samtang nagtuo ang anak sa biktimang si Martina Tanso nga nalumos ang iyang amahan tungod kay dili kini makamaong mulangoy.

 

Base sa saysay sa iyang pag-umangkon, mibiya matud pa sa balay ang iyang amahan ala-una na kagahapon sa hapon kondiin kumpyansa silang mupa-uli ra kini tungod kay na-andan na nilang mu-uli gyod kini kada-gabii higayong makalakaw.

 

Mibati lang sila og kabalaka dihang wala na kini makapa-uli kagabii rason sa ilang pagpangita kaganina hangtud nga nakumpirmang nalumos na kini.

 

Posible matud pang misubay sa baybay ang iyang amahan kinsa posibleng nadakin-as og tungod kay taub kagabii, misangpot kini sa pagkalumos. (Beth Ruiz)