BUTUAN CITY – Pormal nang gisugdan kaganina sa Land Transportation, Franchising and Regulatory Board kon LTFRB Caraga Region ang libreng sakay alang sa mga residente nga atua sa mga lagyong barangay ning syudad ug gustong magpabakuna. 

Una nang gibutyag ni Eldie David, ang Project Manager sa LTFRB-Caraga sa eksklusibong pakighinabi sa Bombo Radyo Butuan nga tumong niini nga matabangan ang katawhan nga mapasayon ang pagbyahe nila ug mahimung luwas sa pagpabakuna. 

-- Advertising --

Mu-abot sa 32 ka units sa pampubikong sakyanan ang maglibot libot sa mga barangay ning siyudad sama sa Barangay Mandamo, Mahay, Pagatpatan, De Oro, Barangay Sto Niňo, Dankias ug Barangay Dumalagan paingon sa mga vaccination areas.

Sigon ni Ricky Sanchez sa eksklusibong pakighinabi ning sibyahan, ang nagdumala sa CARBUTRANSCO, usa sila sa gihatagan og kontrata sa LTFRB-Caraga, aron muhatag og serbisyong libreng sakay alang niadtong mga Butuanon nga duna’y eskedyol nga magpabakuna.

Sakop sa ilang biyahe ang Brgy. Dankias padulong sa FSUU Morelos Campus, apan muhunong sila og tag-dos minutos sa mga crossing nga bahin sa Brgy. Tungao, San Mateo, MJ Santos, Manila de Bugabos, apil na tungod sa Dulag Elementary School, Amparo Elementary School ingon man Bit-os barangay hall apil na sa crossing sa Brgy. San Vicente.

Dinhi na dayon sila muliko patuo sa Montilla Boulevard padulong na sa unang vaccination site ang FSUU gym ug mag-stop over sila sa sunod nga mga vaccination sites sa SM City Mall, Robinson’s Place ug katapusan sa FSUU Morelos Campus sa Brgy. Ambago ning siyudad.

Dugang ni Sanchez nga human og bakuna, susamang ruta ang ilang agi-an hangtud na sa Brgy. Dankias nga maoy ilang point of origin.

Sa ilang pagsugod kaganinang alas-singko sa sayong buntag, wala matud pa’y nanakay sa Brgy. Dankias ug kini tungod kay wala pa mapa-abot ang maong programa ngadto sa ilang mga residente.

Samtang 10-minutos ang interval matud pa sa biyahe sa ilang lima ka mga sakyanan nga apil niini kondiin sa buntag, hakuton nila ang mga residenteng duna’y eskedyol sa bakuna gikan sa alas-singko ngadto na sa alas-nueve sa buntag ug mubalik sila sa alas-dos sa hapon hangtud na sa alas-sais sa gabii.

Base usab sa ilang orientation, mabayaran sila sa LTFRB sa ikatulong semana nasukad sa pagsugod sa ilang libreng sakay.