BUTUAN CITY-Nagpasidaan karun ang Department of Health kon DOH-Caraga sa tanang katawhan ning rehiyon nga mag-amping ug dili magkumpyansa karong gipa-ilalom na sa general community quarantine kon GCQ ang tibook bulan sa Agusto.

Sigon ni DOH-Caraga regional director Dr. Cesar Cassion, dili angayang mukumpyansa ang mga tawo labina nga duna na’y mga kaso sa Delta variant nga natala sa kasikbit nga rehiyon.

-- Advertising --

Gi-awhag niini ang tanan nga hingusgan ang pagpahibalo sa publiko; sundon kanunay ang minimum health protocols ug pagpabakuna kung ila nang eskedyol.

Gi-awhag usab niini ang lain-laing kwalipikadong mga prayoridad nga sektor sa lain-laing mga probinsya sa rehiyon nga pahimuslan ang libre nga bakuna sa gobyerno ug tabangan nga makab-ot ang target nga dili mu-ubus sa 70% nga herd immunity.

Nanawagan usab kini sa mga residente nga kuhaon ang tanang mga gikinahanglang doses sa usa ka bakuna aron ma-angkon ang bug-os nga resistensya sa lawas.

Mala-umon ang DOH-Caraga uban sa mga Local government units kun LGUs nga mas daghang A2 priority groups o mga senior citizens ang mabakunahan batok coronavirus disease human nag-abiso ang kauluhan nga gamiton ang Janssen vaccines sa Johnson and Johnson  alang lamang sa elderly population.

Apan gi-klaro usab sa buhatan nga ang Janssen vaccines dili lamang alang sa A2 category kundi alang usab sa A3 kon kadtong mga dunay comorbidities tungod kay kini nga grupo ang daling mataptan og virus ug kasagaran nga daling ma-ospital.

Madumdumang ang rehiyon sa caraga ang unang nakadawat sa unang batch sa bakunang Janssen niadtong Hulyo 19 kondiin ang matag-vial dunay 5 ka doses ug single shot lamang kini hinungdan nga dili na kinahanglan nga mubalik alang sa ikaduhang dose dili susama sa ubang covid-19 vaccines .

Sa kinatibuk-an, 17 ka kahon sa Janssen vaccines ang nadawat sa DOH Caraga, sulod ang 26-mil ka mga vials kon 130-mil doses ug gipang-apod apod sa nagkadaiyang LGUs ning Rehiyon lakip na sa dakbayan sa Butuan.