BUTUAN CITY – Mihatag na og dalan si Brgy. Ampayon Kapitan Rodencio Basubas Jr. kang 1st Kagawad Danilo ‘Boyet’ Maisog aron magsilbing acting barangay kapitan human nagpagawas og memorandum order si Mayor Ronnie Vicente Lagnada nga nagpahibalo sa tanang heads sa mga buhatan sa City Hall kalabot sa iyang preventive suspension.

Sa eksklusibong pakighinabi sa Bombo Radyo Butuan, gipadayag ni Kapitan Basubas nga daw wala natagbaw ang kadumalahan ning siyudad sa pagpahamtang kaniya og mga suspension tungod kay pinaagi sa maong memorandum dili kini makapirma o maka-proseso og mga dukumento isip kapitan. 

-- Advertising --

Sumala ni Basubas taliwa sa gipagawas nga kamanduan, dili kini niya ilhon tungod kay wala kini basehan ug illegal matud pa. Apan isip legal nga tubag sa maong kamaduan ni Mayor RCL, gibutyag ni Basubas nga nagpasaka  na ang iyang kampo sa korte og Temporary Restraining Order (TRO) ug naglaum nga mopabor kini sa ilang panig.

Sa kasamtangan si kagawad Danilo Boyet Maisog na ang mibarog nga kapitan sa Ampayon aron dili usab mabara ang operasyon sa barangay samtang taliwa usab sa memorandum padayon usab ang iyang pag-adto sa barangay hall subay sa tambag na usab sa iyang abogado.

Alayon niini nangayo og dispensa si Kapitan Basubas kang Kagawad Maisog tungod sa kamaduan diin mamahimong maapektuhan ang tanang empleyado sa barangay Ampayon.