BUTUAN CITY – Emosyunal nga gisaysay ni suspended Ampayon Brgy. Kapitan Rudencio Basubas Jr. ang wala damhang nahitabo sa iyang anak nga si Renz Walter kagabii sa may national highway, crossing sa Villa Paraiso ning dakbayan kagabie. 

Sa eksklusibong pakighinabi sa Bombo Radyo Butuan, gibutyag ni Basubas nga anaa sa maayong kondisyon ang iyang anak human na-operahan kagabii apan wala pa makuha ang bala sulod sa tiyan nga nahimutang matud pa tunga-tunga sa mga gusok niini.

Saysay sa kapitan, adiser pa kini ma-operahan og balik kung molutaw na ang bala paglabay unya sa pipila ka mga semana.

Dugang pa ni Basubas, na-igo ang parte sa baga sa iyang anak ug laing pang internal organ rason sa dili matukib nilang kaguol.

Nasayrang gikan sa ilang panimalay ang iyang anak kauban ang hinigugma dihang dunay mitawag kanilang higala aron matud pa mamertdey rason nga ila kining gi-adtuan agi sa Villa Paraiso pagawas sa national highway dihang nakadungog sila og buto-buto, nga gitu-uhan nilang pabuto lang.

-- ADVERTISEMENT --

Kalit lang matud pang miduol kanila ang riding in tandem ug nangutana sa pangalan sa maong lugar dayong ti-on og pistola kang Renz apan wala magdeklara og tulis rason nga midagan matud pa ang iyang anak ug hinigugma apan na-igo gihapon kini kilid sa lawas.

 Samtang 50/50 ang pagtuo ni Basubas nga duna kini’y kalambigitan sa pag-apil niya karon sa politika dayong butyag nga daghan na’g naghatud kaniya og nagkada-iyang mga deliveries taliwa nga wala siya’y gi-order. 

Daan na matud pa niyang gipasidan-an ang iyang anak nga dili maglakaw-lakaw tungod kay init pa siya karon tungod sa bahid sa pulitika apan wala siya magtuo nga sa sayong gabii, mahitabo kini sa iyang anak.