BUTUAN CITY – Mi-abot sa 875 ka mga pamilya kon 2,819 ka mga indibdiwal ang gihikling kagahapon human nabahaan ang ilang mga barangay tungod sa walay undang nga pagbundak sa ulan nga hatod ni Bagyong Dante. 

Sa pakighinabi sa Bombo Radyo Butuan, gibutyag ni Butuan City Association of Brgy. Captains kon ABC President Gemma Tabada nga ang nasangpit nga mga pamilya anaa karon nagpasilong sa mga evacuation centers nga nahimutang sa Barangay Baan Km. 3, Los Angeles, Sto. Niño, Ampayon, Mahay ug Pangabugan.

-- Advertising --

Hinuon, nag-deploy na og mga personahe ang City Disaster Risk Reduction and Management Office aron masiguro ug ma-monitor ang kahimtang sa mga residente nga apektado sa pag-baha. 

Aduna usa’y natalang mga pagdahili sa yuta nga na-monitor sa lahi-lahing parte ning syudad ilabina sa may Purok 7 Brgy.Taligaman padulong sa Brgy. Bugsukan kansa gitrabaho na kagahapon pa lang aron kini magi-an na sa mga sakyanan. Hinuon gibutyag ni Kapitan Tabada nga manageable lamang ang mga niini.

Taliwala usab sa mga pagbaha sa managlahing barangay ug padahili sa yuta sa ubang dapit wala hinuoy natahong missing o kaha namatay sa daot nga panahon.

Gipasiguro usab sa opisyal nga adunay mga naka-standby nga relief packs alang sa mga apektadong pamilya.

Giklaro usab ni Kapitan Tabada nga sa paghikling gilayon sa mga apektadong pamilya, otomatiko nang ilista ang ilang mga pangalan alang sa ayudang ihatag gilayon sa taga-City Social Welfare and Development kon CSWD.

Kini ilabina nga duna na’y naka-standby daan nga mga food packs nga gitagana unta alang sa mga pamilyang ma-apektuhan sa granular lockdown.