BUTUAN CITY – Mi-apela karon si Major General Romeo Brawner Jr., ang commander sa Joint Task Force Diamond ngadto sa kadumalahan sa komunistang teroristang grupo nga i-abandona na ang ilang armadong pakigbisog.

Dungan kini sa iyang pagklaro nga gi-atubang karon sa nasud ang dili makitang kaaway kansa mas delikado ug makamatay nga dili mu-exempt ni bisan kinsa, nga mao ang COVID-19 virus.

-- Advertising --

Partikular nga gipanawagan ni MGen Brawner ang grupo ni Jorge Madlos kinsa mas naila sa walhong kalihukan sa bansag nga ‘Ka Oris’ aron malinawong mubalik na sa sabakan sa balaud ug biyaan na ang kabukiran aron sila mabakunahan ug mahatagan og insaktong atensyong medikal.

Una nang misaad si vaccine czar Carlito Galvez Jr. kinsa anaa usab sa OPAPP kon Office of the Presidential Adviser for the Peace Process nga bisan ang mga membro sa walhong kalihukan, hatagan gihapon og bakuna aron lang mapakita ang kasensiro sa kagamhanan sa panawagang panag-uli kon rekonsilasyon ning panahon sa pandemya kansa nakapa-usab na sa atong inadlaw-adlaw nga panginabuhi.