BUTUAN CITY – Napalgang buhi kagahapon sa East China Sea ang ikaduhang Pinoy seaman duha ka adlaw human mitiklaob ang iyang gisakyang cargo ship atol sa pagkuso-kuso sa bagyong Maysak. 

Sigon sa Japanese Coast Guard, usa ka 30-anyos ang ikaduhang survivor sa mitikla-ob nga bangka kinsa napalgang lulan sa naglutaw-lutaw nga life raft.

Ang Gulf Livestock 1 nagkarga og 6,000 ka mga baka ug 43 ka mga crew members dihang na-missing kini niadtong Miyerkules. 

Unang napalgang naglutaw-lutaw sa kadagatan kagahapon ang laing tripolante apan gideklara kining patay na.

Madumdumang niadtong Mierkules sa gabii, unang napalgan ang chief officer sa barkong si Eduardo Sareno kinsa nakapangutana pa kung siya lang ba ang naluwas.

-- Advertisement --

Apil sa mga tripolante sa maong barko ang 39 ka mga Pinoy, duha ka mga New Zealanders ug duha ka mga Australians. 

Nagkapupos na karon ang paglaum nga makakita pa og dugang survivors ilabina nga mu-abutay pa sa susamang lugar ang bagyong Haishen. 

Sigon sa Japanese coastguard ang ikaduhang survivor mao ang 30-anyos nga Pinoy nga deckhand sa barko kinsa nagsuot og life jacket sakay sa naglutaw-lutaw nga raft dihang nadiskubrehan sa mga  rescuers kagahapon.

Sigon sa mga opisyal, napalgan siyang duna’y panimuot ug makalakaw nga iya ra.