BUTUAN CITY – Padayon karung giila ang patay’ng lawas sa lalaking napusilan alas 8:15 kagabii sa may Purok-5, Barangay Villa Kananga ning siyudad sa Butuan.

Sa pakighinabi ning sibyahan kang Police Capt. Emmerson Alipit, tigpamaba sa Butuan City Police Office kon BCPO, gi-asuy niining nag-inom ang maong lalaki kauban sa duha pa ka mga kaubanan sa usa ka tindahan sa maong dapit.

Apan sa dihang nahubog na, nanghasi matud pa kini og nangeta ug away.

Na-atol usab nga anaa sa maong dapit si Arvin Fariñas, nga usa ka Philippine Navy Reservist, kansa mibadlon sa maong mga hubog.

Imbes nga maminaw, si Fariñas na hinoon ang gi-engkuwentro diin mikuha ug sundang ang nasangpit nga hubog hinungdan sa pag-atras ni Fariñas hangtud nga kini na-corner.

-- ADVERTISEMENT --

Dinhe na siya mibunot sa iyang pistol ug gipusil sa usa ka higayon ang hubog nga na-igo sa ulo hinungdan sa iyang hinanaling kamatayon.

Sumala pa ni Police Capt. Alipit, gelayong nanagan usab ang mga kaubanan sa maong lalaki samtang ang nakapusil, boluntaryo usab kining mitahan sa Butuan City Police Station-1 og nasuta nga dunay lisensiya ang iyang dalang armas.

Gihaya na karun sa us aka pribadong punerarya sa Barangay Ampayon ning siyudad sa Butuan ang patay’ng lawas sa lalaki samtang gihangyu ang 2 ka kaubanan niini nga mopakita aron mailhan na ang maong biktima.