BUTUAN CITY – Dili makig-settle amicably si suspended Ampayon Brgy. Kapitan Rodencio Basubas Jr. kang acting Brgy. Captain Danilo Maisog Jr. human  niini gikobra ang iyang honorarium panahon sa iyang pagkasuspenso.

Kini ang gibarugan ni Kapitan Basubas human gisugyot sa Committee on Good  Government sa Sangguniang Panlungsod ning siyudad sa Butuan pagpanguna ni committee chairman Rema Burdeos, nga i-settle na lang kini sa duha.

Sa eksklusibong pakighinabi sa Bombo Radyo Butuan, gipadayag ni Basubas nga iyang nadiskubrehan sa iyang pagbalik og duty niadtong Agusto human ang iyang pinaka-ulahing suspensyon, nga nakuha na ni Maisog ang iyang honorarium alang sa mga buwan sa Mayo, Hunyo ug Hulyo ning tuiga.

Gireklamo niya kini sa konseho ning siyudad tungod kay base matud pa sa balaud, dili makuha sa acting barangay kapitan ang honorarium kung wala pa’y final decision sa iyang apela batuk sa suspensyon.

Migawas sa kina-ugalingong pagpakisayod ni Basubas nga nahatag ang iyang honorarium base na usab sa approval ni Brgy. Kagawad Conrado Cabarlo, chairman sa Committee on Appropriations sa Brgy. Council rason nga apil kini sa iyang gireklamo.

-- ADVERTISEMENT --

Nasuta pa niya nga duna’y gipapasar nga resolusyon ang barangay council alang niini rason nga plano ni Basubas nga apil sa iya pang ireklamo og dugang ang mga signatories sa maong resolusyon.

Ang gikadismaya ni Basubas tungod kay apil sa gikuha ni Maisog ang iya untang honorarium alang sa buwan sa Agusto atol sa iyang pagbalik rason nga wala niya kini makuha.

Dismayado usab siya sa suhestyon sa komite ni Burdeos nga amicable settlement taliwa nga duna’y dakong kwartang klarong nakuha samtang siya nga igo lang gipasanginlan apan wala’y ebidensyang napresentar, pila ka higayon nang nasuspenso.