BUTUAN CITY – Plano sa Department of Education kon DepEd-Butuan City Division nga i-pilot karong Enero tuig 2021 ang face-to-face learning sa mga lugar nga wala’y natalang kaso sa COVID-19 o kaha sa apil sa mga very low-risk areas.

Sa eksklusibong pakighinabi sa Bombo Radyo Butuan, gipadayag ni Dr. Marilou Dedumo – schools division superintendent, kini ang ilang pa-aprubahan pa sa ilang sentrong buhatan ug sa Inter-Agency Task Force.

-- Advertising --

Apan giklaro sa opisyal nga applicable lamang kini sa mga remote areas kon sa kabukiran o kabaryuhan.

Higayong ma-aprubahan, limitado lamang usab ang pasudlong mga estudyante kinsa half-day lang kung musulod sa mga eskwelahan isip pag-obserba gihapon sa social distancing.

Samtang giklaro sa opisyal nga wala’y tugutang mga tapok-tapok o selebrasyon karong holiday season.

Sigon ni Dedumo, hugot pa gihapong gidili ang panagtapok rason nga wala’y tugutang Christmas party apan kung dili malikayan, virtual celebration lang ang tugutan.

Mamahimo matud pang duna’y program o Christmas activity apan kinahanglang himuon kining online ug dili physical celebration aron malikayan ang pagtakod-takod sa COVID-19.