BUTUAN CITY – Gikwestyon karon ni Engr. Serge Pascual kung kinsa ang nag-isyu og bag-ong titulo sa yuta nga iyang napalit 25 ka tuig na ang nakalabay dayong kwestyon kung matituluhan ba ang yutang titulado nang daan.

Sa eksklusibong pakighinabi sa Bombo Radyo Butuan, gipadayag ni Pascual nga  gipatawag na sila sa barangay kaniadto pa tungod sa nangangkon sa maong yuta nga si Edwina Ybañez, taliwa nga iya na kining napalit gikan pa sa pamilya Andaya ug Guillen partikular na sa gipalitan niyang amahan mismo ni incumbent city councilor Omar Andaya.

Nagtuo kining mga professional squatters, mga abogado, mga anaa sa piskaliya ug mga huwis, ingon man mga opisyal sa Department of Environment and Natural Resources kon DENR-Caraga ang nagkunsabo niini aron makapagawas og bag-ong titulo.  

Mas misamot ang iyang katingala tungod kay sa kinatibuk-ang kapin sa 9-ektaryang luna, parcel lang niini nga mu-abot sa kapin 2-ektaryas ang gi-ilog ug gipatituluhan.

Tungod niini, nagtuo siyang panapi ang tinguha sa mi-ilog sa iyang yuta tungod sa proyekto kaniadto sa Kajima Construction Company ug sa Department of Public Works and Highways kon DPWH CAR-BDP sa may sapa nga bahin nga maoy gipalapdan.

-- ADVERTISEMENT --

Nasayran niyang mukabat sa 2-milyunes pesos ang kantidad sa kwartang makuha sa nangilog ngadto sa CAR-BDP tungod sa road right of way kansa maoy nagpahibalo kaniya sa laing claimant, bitbit ang laing titulo.

Mismong ang CAR-BDP na ang nag-imbestiga niini ug nasutang peke ang gipakitang titulo sa laing claimant human matud pa gisapawan ang iyang titulo sa yuta rason nga nagdesisyon ang CAR-BDP nga siya ang bayran sa ilang obligasyon.