BUTUAN CITY – Nagpakita og siento porsientong pagsalig ug kumpyansa sa COVD-19 vaccine ang mga tag-as nga opisyal sa lungsod sa Santiago, Agusan del Norte human nakadawat sa unang dose sa Sinovac.


Sa pakighinabi sa Bombo Radyo Butuan, gikumpirma ni Santigao Sangguniang Bayan Member Sulpicio Dedumo, nga lakip siya uban sila Mayor Franklin Lim , Vice Mayor Zenaida Lim ug laing tulo ka SB members nga miembro na sa Senior Citizens ang nakadawat na sa unang dose sa Sinovac adtong Lunes, Mayo 3 nga lakip sa priority group A2.

-- Advertising --

Sumala ni Dedumo human napagawas ang schedule sa mga pagbakuna sa mga senior citizens sa ilang lugar, wala na sila magmakuli pagpabakuna batok sa COVID-19 isip pagtuman na usab sa ilang adbokasiya sa lungsod nga mabakunahan ang tanang tawo, tungod kay dili malimod nga aduna pa gihapo’y mga indibidwal nga nagduha-duha ug nabalaka sa mga bakuna karon batok sa COVID-19.


Pinaagi matod pa sa ilang gihimo naglaum kining mawagtang na ang mga kabalaka labi na sa ilang mga konstituwente ug madasig magpadapat na usab sa bakuna.
Gidugang sa 66-anyos nga konsehal nga normal lamang ug wala siya’y laing gibati ingon man sa mga ka-ubanang nakadwat na sa bakuna gawas sa pagpanghawoy sa bukton diin gitupok ang bakuna kansa normal lamang nga bation.


Adunay 9 ka barangay ang Santiago diin sa unang adlaw sa pagmakuna muabot sa kapin 100 ka mga senior citizens sa usa ka barangay ang malampusong nakadawat sa unang dose ug gikatakdang mudawat sa ikaduhang dose karong Mayo 31.