BUTUAN CITY- Nagpadayon ang hot pursuit operation nga gilusad sa kapulisan sa Butuan City Police Station kon BCPS-4 sa usa sa tulo ka mga suspek sa natigayong pagpang-hold up ug pagpamusil ning mi-aging kaadlawon sa Purok 1, Brgy. Antongalon ning siyudad sa Butuan human nadakpan ang duha niini.

Ang maong panghitabo mibiktima sa usa ka 15-anyos nga grade-10 student nga residente sa Purok 3-B, Brgy.Taligaman ning siyudad.

Samtang ang mga suspek kinsa na-ilhan sa biktima ug sa iyang mga higala, nailang sila Harold Jimenez Guardina, residente sa Purok Lawaan, Brgy. Pangabugan; Joshua Cañete Banog, residente sa Purok Camote, Brgy. Maon, ug alyas Boy Itom, residente sa Brgy. Basag, pulos sakop ning siyudad sa Butuan.

Migawas sa inisyal nga imbestigasyon nga nag-jogging matud pa ang  biktima ka-uban ang iyang mga higala dihang nalabyan niini ang mga suspek nga nag-ayo kunuhay sa ilang kolor pula nga motorsiklo nga wala’y plaka.

Dinhi na matud pa miti-on sa wala pa masutang kalibre sa armas si Joshua Banog ngadto sa biktima dayong kuha ang iyang cell phone ug gipusil ang siko sa biktima nga mitapsing pa sa iyang tiyan hinungdan sa iyang pagkadala sa Butuan Medical Center apan gideklarang out-patient sa iyang attending physician.

-- ADVERTISEMENT --

Kagahapon nadakpan na sa ginsakpan sa Butuan City Police Station kon BCPS-4 ang duha sa tulo ka mga suspek nga sila Banog ug alyas Boy Itom.

Sa eksklusibong pakighinabi sa Bombo Radyo Butuan, gipadayag ni Butuan City Police Station 4 commander Major Henry Samillano Jr., nga ang maong mga dinakpan mao usab matud pa ang responsable sa natigayong pagpanulis sa Brgy. Ampayon nga mibiktima sa anak ni suspended Ambayon Brgy. Kapitan Rodencio Basubas Jr. ug sa Brgy. Antongalon.

Kini base na usab sa saysay sa mga nakasaksi ug sa mismong mga biktima.

Gibutyag pa sa opisyal nga duna’y panahon nga late ang reklamong mu-abot kanila depende sa gilay-on sa dapit nga nahitabuan apan respondehan gilayon kini sa ilang mga personahe alang sa imbestigasyon.

Sa usa pa ka at-large nga suspek, gibutyag ni Major Samillano nga katungod na nila ang pagpangulipas sa algasyong gibato kanila ilabina sa gipangita pang si Guardina apan ila kining pamatud-an sa korte.