BUTUAN CITY – Miresulta sa pagkasikop sa upat ka mga indibidwal lakip na sa usa ka dalagita ang gikasang buy-bust operation sa Butuan City Police Station kon BCPS-2  sa Purok-2, Barangay Obrero ning siyudad sa Butuan pasado alas-3 sa hapon kagahapong adlawa.

Naila ang mga nadakpan ang dalagang si Gerlex Burias Abamonga, 19 anyos, ultawong si Melchor Paler Abogade, 29 anyos, parehong temporaryong nagpuyo sa nasangpit nga barangay ug Alfie Emboy Sinogan, 38-anyos, residente sa P- lilo, Barangay Banza, ning syudad ug ang usa ka 16-anyos nga dalagita.

-- Advertising --

Sa eksklusibong pakighinabi sa Bombo Radyo Butuan, gibutyag ni PMajor Nelson Bailo, Station Commander sa BCPS2 nga taod-taod na nilang gi-monitor ang maong mga suspek diin atol sa buy-bust operation sulod sa usa ka boarding house, dinhi na nasapon ang mga suspek nga nag-pot session kon migamit og gidiling droga resulta sa ilang pagkasikop.

Samtang gipadayag usab ni Obrero barangay Captain Donde Rivero nga mga dayo sa iyang barangay ang mga nadakpan dungan sa pagbutyag nga balik-balik na usab matod pa presohan ang usa sa mga nadakpan nga si Gerlex Burias Abamonga.

Narekober sa lugar ang duha ka gagmay’ng sachets sa gidudahang shabu, one thousand pesos nga marked money ug nagkada-iyang drug paraphernalia, selpon ug 2 ka mga medium sized nga sachet sa shabu   nga nakuha sa posisyon ni Alfie Emboy Sinogan.

Mu-abot sa usa ka gramo ang kinatibuk-ang timbang sa nakuhang droga diin mukabat Php 11,800.00 ang DDB value niini.

Anaa sa kustodiya sa BSPO2 ang mga nadakpan alang sa tukang disposasyon.