BUTUAN CITY – ‘Save Nasipit From Kupit’ ang election cry karon sa Team Doyon sa lungsod sa Nasipit, Agusan del Norte human hingpit nang naka-file sa iyang certificate of candidacy si kanhi Nasipit, Agusan del Norte Mayor Orlando Roy Doyon nga maoy maka-atbang sa Butuanon ug kanhi mayor usab sa maong lungsod nga si Roscoe Plaza.

Photo: CTTO

Ka-uban ni Atty. Doyon pag-file og COC ang kompleto niyang municipal slate kinsa nagpadayag nga ang ilang lungsod, angayan lang dumalahon sa taga-Nasipit nga maoy nasuhito sa mga kakulangon sa katawhan.

Sa eksklusibong pakighinabi sa Bombo Radyo Butuan, gipadayag ni Atty. Doyon nga wala matud pa’y nahatag nga kaayuhan sa katawhan sa ilang lungsod si Roscoe atol sa iyang termino nga sarang matatak sa alimpatakan sa katawhan.

Dili matud pa maayo nga mapildi lang ang taga-Nasipit tungod sa kawala’y kwarta nga mao matud pa unta’y hinuktukan sa katawhan sa rasong dako matud pang insulto nga ang dili taga-Nasipit maoy mudumala sa maong lungsod.

Apan dali kining gitubag ni Plaza pinaagi sa pagbutyag nga wala sa yutang natawhan ang pag-alagad sa kinatibag-ang katawhan kondili anaa sa kasing-kasing.

-- ADVERTISEMENT --

Sa eksklusibong pakighinabi ning sibyahan, gipadayag niining wala siya’y laing tinguha kondili ang paghatag og paninabuhian sa mga Nasipitnon uban sa pag-abag sa probinsyal nga panggamhanan pinaagi sa pagpadayon na matud pa sa dugay nang planong industrial zone.