BUTUAN CITY – All set na ang Department of Education kon DepEd-Butuan City Division sa pagsugod na sa klase karong Lunes, Septembre 13 sa tibuok nasud alang sa school year 2021-2022.

Sigon ni schools division superintendent Dr. Marilou Dedumo, wala’y tunghaan ning siyudad ang mu-adaptar sa face-to-face classes nga maoy gihingusgan karon sa ilang sentrong buhatan tungod kay virtual learning lang gihapon ang ilang i-adaptar.

-- Advertising --

Sa eksklusibong pakighinabi sa Bombo Radyo Butuan, gipadayag sa opisyal nga nagpadayon karon ang distribusyon sa mga modules ilabina nga duna pa’y uban nga mga ginikanan ang wala pa makakuha niini tungod sa gipatumang Modified Enhanced Community Quarantine kon MECQ sa pipila ka mga barangay ning siyudad ning mi-aging mga adlaw.

Tungod niini, iya na lang gimanduan ang mga school heads nga makig-alayon ngadto sa mga volunteers ug sa mga barangay officials aron matabangan silang mapang-apod apod na ang mga modules ilabina nga magsugod na usab karong Lunes ang pagbasa ug pagtubag sa mga niini.

Sa ubang mga barangay usab, mahimo nang kuhaon sa mga ginikanan ang mga modules diha sa ilang mga opisyal sa purok, o ba kaha sa mismong tunghaan ilabina niadtong anaa sa mga lagyong dapit diin dili kaayo sila apektado sa tinakdanay sa COVID-19. Wala matud pa’y problema kanila ang online class tungod kay ila ra mang ipadala ang soft copy sa ilang modules diha sa e-mail add sa mga estudyante.

Samtang sa panig usab sa mga magtutudlo, kadaghanan kanila mu-adaptar sa ‘work from home’ apan 30-porsiento kanila ang mudalikyat sa tunghaan ug kinahanglang magsunod gihapon sa ilang eskedyol sa tinggawas gamit ang ilang color-coded quarantine pass.

Tumong sa pagdalikyat sa mga magtutudlo sa ilang tunghaan, ang pagplastar lang sa modules ug magpadayon pa sa ilang trabaho sa ilang panimalay ug mubalik usab sa tunghaan aron magkuha ug pag-check sa mga modules nga ipasa sa ilang mga eestukdyante.