BUTUAN CITY – Padayon pang gisuta sa Municipal Agriculture’s Office sa lungsod sa Buenavista, Agusan del Norte kung pila ang kinatibuk-ang damyos nga namugna sa pagsangad  sa barge nga gipanag-iyahan sa Miling Shipping Company ug gikontrata sa Agatha mining company didto sa fish sanctuary sa Brgy. Manapa.

Sa eksklusibong pakighinabi sa Bombo Radyo Butuan, gipadayag ni Municipal Agriculture officer Clyde Chavez, naghulat pa siya sa itakdang assessment sa taga-Bureau of Fisheries and Aquatic Resources kon BFAR-Caraga nga maoy duna’y kapasidad pagkwenta sa mga nadaut nga corals ug mga puy-anan sa isda tungod sa maong insidente.

Madumdumang nakurat na lang sila niadtong Sabado sa buntag dihang nakita nga nasangad na sa fish sanctuary nga duna’y gidak-ong 25-mil ektaryas, ang nasangpit nga barko human gihapak sa mga dagkong balud ug kusog nga hanging hatud sa bagyong Maring.

Sa iyang pakig-istorya sa kapitan sa bako, gipadayag matud pa niining midunggo lang sila nga wala’y kasayurang fish sanctuary kini taliwa nga bag-uhay pa lang kini gita-uran og solar-powered nga mga buya.

Gila-umang ma-assess na nila karong semanaha ang damyos nga hatud sa maong insidente kondiin mu-uban usab nila sa taga-BFAR ang diving team sa Agatha mining company.

-- ADVERTISEMENT --

Andam matud pang tubagon sa nasangpit nga mining company ang masutang damyos sa nasangpit nga insidente.