BUTUAN CITY – Padayon pa ang imbestigasyon sa kapulisan sa lungsod sa Tubay, Agusan  del Norte aron matumbok kung duna ba’y foul play o kung nag-suicide ba ang negosyanteng si Noel Sabalo samtang anaa sulod sa iyang sakyanan dihang mihunong sa Brgy. Sta. Ana sakop sa maong lungsod.

Sa eksklusibong pakighinabi sa Bombo Radyo Butuan, gipadayag ni Agusan del Norte Police Provincial Director Col. Martin Gamba nga apil sa ilang gisuta ang posibleng kalambigitan sa biktima sa pagpusil-patay matud pa niini ngadto sa gika-ingong iyang ka-ipon didto sa lungsod sa Magsaysay, Misamis Oriental kagahapon sa hapon nga iyang gisibatan.

Photo: CTTO

Ang maong panghitabo daling na-relay ngadto sa 2nd Provincial Mobile Force Company pasado alas-otso kagabii pagpanguna ni LCol Rechie Yatar apil na ang klase sa sakyanang gigamit sa suspek rason sa ila gilayong pagmontar og mobile checkpoint.

Dihang nakalabay na ang maong sakyanan og wala mihunong, gigukod kini sa mga pulis hangtud nga mihunong sa Brgy. Sta. Ana ug misunod na ang usa ka buto sa armas ug dinhi na nakita ang nagkadugo nang patay’ng lawas sa negosyante.

Base sa gihimong pakisusi ning sibyahan, naila ang babayeng gipusil didto sa Magsaysay nga si Daryl Dalogdog Legaspi kinsa usa matud pa ka magtutudlo ug duna’y usa ka anak sa negosyante.

-- ADVERTISEMENT --