BUTUAN CITY – Alarming na kaayo ang mga healthcare facilities ning siyudad sa Butuan tungod sa padayong pagsaka sa mga kaso sa COVID-19 rason nga nagkulang na usab ang oxygen supply.

Sa eksklusibong pakighinabi sa Bombo Radyo Butuan, gipadayag ni Butuan City administrator Rey Desiata nga bisan og wala pa’y kumpirmadong kaso sa COVID-19 Delta variant dinhi sa siyudad apan makita sa mga nagtunhay karong mga kaso nga ania na kini sa Butuan.

-- Advertising --

Kini ilabina nga nagkabata ang mga nag-igo ug na-admit tungod sa COVID-19 ug sa nagkapuno na nga mga isolation facilities hinungdan nga ang tanang ospital ning siyudad, nagpagawas na og advisory nga puno na ang ilang bed capacity.

Sa pagkakaron, ang 48-bed capacity sa COVID ward sa Butuan Medical Center sukad niadtong Huwebes fully-booked taliwa nga nagdugang sila og dugang katre aron dili matandog ang non-COVID ward.

Sa maong adlaw, mi-abot sa 51 ka mga COVID patients ang gi-cater sa maong ospital, wala pa’y labot ang 18 nga anaa sa triage section ug waiting area sa maong ospital ug kini wala pa’y labot sa mga COVID-19 patients nga duna’y mild ug moderate symptoms nga anaa gibutang sa BMC annex building.

Kung kaniadto kasagaring ma-igo niini kadto lang mga senior citizens ug duna’y comorbidities, apan karon mi-igo na usab kini sa mga batan-on ug sa mga wala’y comorbities ug kamtu-uran niini ang usa ka estudyante sa Father Saturnino Urios University nga nakutluan matud pa sa iyang kinabuhi.

Subay usab sa nagkataas nga kaso ning siyudad, hangtud karon wala pa’y nadawat ang LGU nga duna na’y Delta variant apan tungod kay nagkabata na ang na-igo sa COVID-19, indikasyon lang nga ania na sa palibot ang Delta variant susama sa ubang mga lugar nga nakatala na sa susamang variant.

Kini matud pa ang nakapa-aghat sa city government nga hangyuon ang Regional Inter-Agency Task Force nga ipa-ilalom sa Modified Enhanced Community Quarantine kon MECQ ang 76 sa 86 ka mga barangay ning siyudad.

Sigon ni Desiata, tumong lamang sa city government nga mapugngan ang paglihok-lihok sa mga tawo aron mapugngan ang padayong pagsaka sa COVID-19 cases ning siyudad.

Bisan ang curfew hour, gikan sa alas-dose sa tungang gabii sa pagsugod niini, mas gipasayo kini ngadto sa alas-dies sa gabii hangtud sa alas-kwatro sa kaadlawon.

Anaa pa ang pagtugot nila pag-adaptar sa alternative work arrangements sa mga buhatan aron dili kaayo daghan ang mag-duty sa opisina sa ingon malikayan ang panagtapok-tapok.

Gawas niini, duna usa’y mga lakang nga gipatuman ang kabaranggayan pinaagi sa pagtahas sa ilang mga barangay tanod aron mangdakop sa mga mulapas sa health protocols.

Kagahapon usab, gituyukan nila ang tanang establisamiento ning siyudad ug gipahimangnuan nga tan-awon gyod ang quarantine pass sa mga manulod aron masuta kung sakto ba kini sa adlaw sa ilang eskedyol.

Gipasabot pa sa opisyal nga ang mga barangay nga ubos sa MECQ, kansa nagbukas og mga fitness gyms, limitado lang ang i-cater nga kliyente.