BUTUAN CITY – Giklaro ni Dr. Pinky Espelimbergo, ang medical specialist sa Benefit Administration Section sa PhilHealth-Caraga nga duna sila’y tulo ka package alang sa COVID-29 response sa mga pasyenteng ma-admit sa ospital tungod sa COVID-19.

Sa eksklusibong pakighinabi sa Bombo Radyo Butuan, gipadayag sa opisyal nga ang bayaran lang sa ilang ahensya mao kadtong na-admit ug na-diagnose nga duna’y COVID pneumonia tungod kay niini nga kondisyon kasagaran magsugod ang dakong problema sa panglawas sa pasyente, kung hisgutan ang reimbursement.

Apil sa package niini nga kondisyon, ang ma-cover sa PhilHealth mag-agad sa severity sa kondisyon kondiin sa mild pneumonia nga alang lang sa mga senior citizens ug kadtong duna’y comorbidities, maka-cover sila og hangtud sa P43, 997.00.

Sunod nga package ang alang sa moderate pneumonia nga mukabat sa P143,257,00 kansa wala na’y pili-ong pasyente.

Ikatulo ang severe COVID pneumonia nga bayran sa PhilHealth og P333,519.00.

-- ADVERTISEMENT --

Ang mas grabe nga anaa sa critical, ma-cover ngadto sa P786,384.00 dungan sa pagklaro nga ang ilang mga COVID packages duna’y limitasyon sa ospital. 

Hinuon ilang ikonsidera panahon nga duna’y surge sa kaso kondiin ang mga level 1 nga ospital, mahimong mu-cater sa mga pasyenteng duna’y hangtud sa moderate conditions.

Gidugang pa ni Dr. Espelimbergo nga bisan og ang pasyente duna lama’y mild condition, duna gihapo’y tendency nga mulapas sa package nga i-cover ang mabayran sa PhilHealth tungod kay ang kasamtang package, gibase sa panahong mao pay pagsugod sa pandemya.

Dili na matud pa katingad-an ang excess sa bayrunon sa pasyente tungod kay ang tambal nga idapat depende man sa severity sa iyang kondisyon.