BUTUAN CITY – Epektibo na sugod sa alas-12:01 sa Biernes sa kaadlawon, Mayo 28 ang Executive Order No. 14-A series of 2021 nga gipagawas sa buhatan ni Butuan City Mayor Ronnie Vicente Lagnada.


Kini human nga gibutang na sa Department of Health kon DOH-Caraga ngadto sa high risk ang dakbayan tungod sa padayong pagsaka sa mga kumpirmadong kaso sa COVID-19 sulod na sa pipila ka mga semana.

-- Advertising --


Sa eksklusibong pakighinabi sa Bombo Radyo Butuan, gipadayag ni Butuan City government spokesperson Michiko de Jesus, anaa usab sa high risk level ang Health Care Utilization Rate kon ang paggamit sa mga hospital beds ug mga facilities nga nangdawat sa mga pasyente nga nasakit sa Covid-19 hinungdan nga ang mga ospital ning dakbayan mubalibad na sa mga dugang pasyente tungod kay wala na’y bakanteng kwarto.


Tumong sa gipagawas nga EO nga ma-implementar ang mas istriktong health protocols sa ingon ma-undang na ang tinakdanay ug makunhuran ang mga kumpirmadong kaso.


Apil sa mga bag-ong guidelines sa Executive Order No. 14-A ang pagpatuman og balik sa tulo ka adlaw nga color-coded quarantine pass panahon nga mogawas sa balay apil na ang pagpatuman sa curfew hours nga sugdan sa alas-dies sa gabii hangtud sa alas-kwatro sa kaadlawon.


Ipatuman na usab ang total liquor ban sa mga pribado ug pampublikong lugar kondiin 24 oras nga walay pagpalit, pagbaligya o pag-silbi sa ilimnong makahubog ug bawal na usab ang mga mass gatherings.