BUTUAN CITY – Gikumpirma sa Department of Agriculture kon DA-Caraga nga nakatala na og kaso sa African Swine Fever kon ASF ang rehiyon partikular sa   Brgy. Matho, lungsod sa Cortes, Surigao del Sur. 

Apan daling giklaro ni DA-Caraga executive director Abel James Monteagudo nga isolated lang ang maong kaso ug daling na-contain tungod sa hini-usang paningkamot tali sa local government ug sa mga membro sa Regional ASF Task Force. 

-- Advertising --

Samtang gibutyag usab ni Dr. Apple Jarumahum, ang DA-Caraga ASF focal person, na-cleared na sa regional task force uban sa National Meat Inspection Service kon NMIS ang area nga gikonsiderang ground zero hangtud na ngadto sa .5-kilometer-radius. 

Gipaniguro pa ni Jarumahum nga ipadayon sa task force ang ilang imbestigasyon ug clearing activities sa managlahing lugar sa Cortes.

 Sa pagkakaron, wala pa’y gipagawas nga datus ang ahensya kung pila gyod ang ihap sa mga hog fatalities apan gikabutyag nga na-cull o na-dispose na sa mga otoridad ang mga baboy nga duna’y simtomas sa ASF sa ground zero ug sulod sa 500 meter-radius. 

Gikumpirma usab sa task force nga ang hinungdan sa ASF contamination sa ground zero mao ang mga processed pork products kon mga wala gi-regulate nga pagpamaligya og mgaprocessed food products ug kini karon ang ilang gidetermina, ang tuburan kon source sa mga processed food products. 

Nasayrang ang pinakaduol nga lugar sa Caraga nga duna’y kumpirmadong ASF cases mao ang Tagum City sa Davao Region ug ang Iligan City sa Lanao del Norte.