BUTUAN CITY – Padayon ang pagpangandam sa Department of Education kon DepEd-Caraga alang sa pag-pilot na sa face-to-face classes sa pipila ka mga piniling tunghaan sa entiro nasud.

Dinhi sa rehiyon, gipadayag ni DepEd-Caraga spokesperson Peter Tecson nga sa 20 ka mga pampublikong tunghaang na-identify nga mahimong magpahigayon sa in-person classes, mi-abot na lang kini sa 14 human ang gihimong evaluation ug assessment sa mga taga-Department of Health, apil na sa hingtungdang mga local government units ug sa mga ginikanan.

Sa eksklusibong pakighinabi sa Bombo Radyo Butuan, gipadayag ni Tecson nga sa maong ihap, gibahin kini sa elementarya ug sekondarya nga atua lamang sa Dinagat Island province,  Siargao Island ug pipila ka tunghaan sa Surigao del Norte ug Surigao del Sur. Giklaro sa opisyal nga wala’y tunghaan gikan sa ubang lalawigan sa Caraga ang gitugutang mag-face-to-face classes tungod sa taas pa nga mga kaso sa COVID-19.

Kada-adlaw matud pa ang ilang monitoring sa maong mga tunghaan tungod kay gipaningkamutan nilang makapahigayon na kini og klase atubangan sa ilang pipila lamang ka mga estudyante.

Giklaro usab ni Tecson nga dili lang ang DepEd ang magdesisyon kung unsa nga mga tunghaan ang i-apil nila sa maong klase kondili apil na ang local government unit, Department of Health ug mga ginikanan.

-- ADVERTISEMENT --

Alang sa mga kindergarten, 12 lang ka mga bata ang dawaton sa usa ka klase samtang 16 alang sa grades 1 hangtud 3 nga magklase og tulo lang ka oras sulod sa usa ka adlaw samtang 20 ka mga estudyante matag-klase sa senior high school ug upat ka oras lang ang ilang klase.

Blended learning gihapon ang mahitabo tungod kay dili man inadlaw ang klase kondili lat-ang lat-ang og usa ka semana.

Samtang ang mga magtutudlo, kinahanglang residente ra usab sa lugar nga nahimutangan sa tunghaan ug bakunado usab.

Kung duna’y magpositibo sa COVID-19 sa mga anaa sa  usa ka klase, otomatiko gilayong isuspende ang face-to-face classes.