BUTUAN CITY – Ipa-ilalom sa Modified Enhanced Community Quarantine (MECQ) sugod karung adlawa hangtod sa Hunyo 15 ang dakbayan sa Butuan ingon man ang entiro Agusan del Sur.

Kini tungod sa pas-pas nga pagsaka sa ihap sa kaso sa COVID-19 sukad pa ning nakalabay’ng semana.

-- Advertising --

Samtang magpabilin usab sa General Community Quarantine (GCQ) gikan Hunyo 1 hangtod 15 ang National Capital Region (NCR) Plus.

Sa gihimong talk to the nation ni Pangulong Rodrigo Duterte kagabii, gi-aprubahan niini ang rekomendasyon sa Inter-Agency Task Force nga palapdan pa ang GCQ with restrictions sa NCR, Bulacan, Cavite, Laguna ug Rizal.

Gibutang usab sa GCQ status gikan Hunyo 1 hangtod 30 ang mga lugar sa Cordillera Administrative Region, lakip ang Abra, Baguio City, Kalinga, Mountain Province; Isabela, Nueva Vizcaya, ug Quirino sa Region 2; Batangas ug Quezon sa Region 4-A; Iligan City sa Region 10, Davao City sa Region 11 ug Lanao del Sur ingon man Cotabato City sa BARMM.

Anaa usab sa Modified Enhanced Community Quarantine (MECQ) gikan Hunyo 1 hangtod 15 ang Apayao, Benguet ug Ifugao sa Cordillera Administrative Region ug Puerto Princesa sa Region 4-B; Iloilo City sa Region 6; ug Zamboanga City, Zamboanga Sibugay, Zamboanga del Sur ug Zamboanga del Norte sa Region 9 ug Cagayan de Oro City sa Region 10.

Ang mga nahabiling lugar sa nasud ipailalom sa Modified General Community Quarantine (MGCQ) ning entiro buwan sa Hunyo.