BUTUAN CITY – Nakig-alayon na ang lokal nga kagamhanan sa dakbayan sa Butuan ngadto sa Department of Health kon DOH-Caraga, pribadong sektor ug uban pang line agencies subay sa ipahigayong National Vaccination Days karong Nobyembre 29 hangtud Disyembre 1.

Sa eksklusibong pakighinabi sa Bombo Radyo Butuan, gipadayag ni Butuan City government spokesperson Michiko de Jesus, aron makab-ot ang target nga 15-milyunes ka mga indibidwal nga mabakunahan sa tibuok nasud sulod sa tulo ka adlaw, duna na’y mga lakang nga gihimo ang city government isip abag sa maong tinguha ug apil na niini ang mobile vaccination sa kabaranggayan.

Wala pa’y labot niini ang Oplan TokBak kon Oplan Toktok Bakuna diha sa kabaranggayan nga inisyatiba usab sa Association of Barangay Captains kon ABC-Butuan City Federation.

Wala matud pa’y angayang kabalak-an kung hisgutan ang supply sa bakuna tungod kay abunda niini ang tanang LGUs ning rehiyon sa Caraga.

Sa maong mga adlaw, mahimong mu-adto sa lima ka mga vaccination sites ang mga magpabakuna nga mao ang FSUU gym, Butuan Doctors Hospital, SM Butuan, Robinson’s Place ug MJ Santos Hospital ug lain pa ang mobile vaccination sa kabaranggayan.  

-- ADVERTISEMENT --