BOMBO BUTUAN – No show si Bayan Muna Partylist Representative Eufemia Cullamat sa lubong sa iyang rebeldeng New People’s Army kon NPA nga anak nga si Jevilyn kinsa namatay sa engkwentro niadtong Sabado didto sa bukirang bahin sa Marihatag, Surigao del Sur.

Photo: CTTO

Sa eksklusibong pakighinabi sa Bombo Radyo Butuan, gipadayag ni 1Lt Krisjuper Punzalan sa 3rd Special Force ‘Arrowhead’ Battalion, Philippine Army, pasado alas-2:30 kagahapon sa hapon gina-og ang patay’ng lawas niini gikan sa ilang panimalay lahos na sa simbahan ug ngadto na sa ilang sam-ang. 

-- Advertising --
Photo: CTTO

Wala maka-uli si Congresswoman Cullamat tungod sa taas nga prosesong angayan pa niyang agi-an tungod sa pagsunod sa health protocols nga hatud sa COVID-19.

Samtang sigon sa tigpamaba sa pamilya Cullamat nga si Jezreen, igsoon sa namatay, daghang mga negatibong impormasyong gipa-abot kanila batuk sa kasundaluhan aron dauton lang ang militar apan mas gipalabi nila ang ilang nakitang pag-abag sa kasundaluhan kanila ilabina nga una na nilang nasaksihan nga gibiyaan lang sa nanibat nga ka-ubanan ang iyang manghod nga wala na’y kinabuhi ug ang kasundaluhan na ang nagnaog sa patay’ng lawas niini. 

Photo: CTTO

Dako ang pagpasalamat sa pamilya Cullamat ngadto sa pwersa sa kasundaluhan apil na sa 401st Brigade, Philippine Army sa tabang nga gitunol ngadto sa ilang pamilya gikan sa pagkanaog sa patay’ng lawas niini gikan sa encounter site sa kabukiran sa Marihatag, Surigao del Sur ngadto na sa iyang paghaya hangtud na sa paglubong.