BUTUAN CITY – Opisyal nang gi-ablihan ang 50-bed quarantine facility sa may Brgy. Baan Km. 3 ning siyudad nga usa ka grant gikan sa Department of Public Works and Highways-Butuan City District Engineering Office kon DPWH-BCDEO ngadto sa city government.

Sa eksklusibong pakighinabi sa Bombo Radyo Butuan, ni Konsehal Cherry Mae Busa, chairman sa Committee on Health sa Sangguniang Panlungsod, ang halos 25-milyunes pesos nga balor sa grant, nagtinguha nga matabangan ang lokal ng kagamhanan ning siyudad nga ma-akomodar ang mga pasyenteng mataptan sa COVID-19 ilabina kadtong duna’y mga simtomas.

-- Advertising --

Dumalahon kini sa mga personahe sa City Health Office kon CHO ug sa Butuan Medical Center BMC.

Dugang ni Busa, nag-commit na kanila ang Department of Health kon DOH-Caraga nga maghatag og dugang nurses, midwives ug doktor nga swelduhan sa maong ahensya.

Gibutyag pa ni Konsehal Busa nga higayong mawala na ang pandemya, gamiton na unya ang mga quarantine facilities alang sa mga simple ug mild nga mga sakit aron dili na dalhon pa sa BMC subay na usab nakalatid sa primary health care facility base na usab sa Universal Healthcare Act nga gipirmahan na ni Pangulong Duterte.