BUTUAN CITY – Andam ang 11 ka indibidwal nga magpasaka og kaso batuk sa usa ka babayeng gi-alegahang illegal recruiter aron musulod sa Philippine Army, human nadakpan sa kapulisan atol sa entrapment operation sa P-3, Villa Paraiso, Brgy. Ampayon, ning siyudad sa Butuan City kagahapon sa alas- 2:00 sa hapon.

Naila ang suspek nga si Floramie Sapanta Cabillo, 23 anyos ug nagpuyo sa P-7, Pinatilan, Valencia City, Bukidnon kinsa na-ila usab sa alyas nga Marialyn Olympia Floramie Madrigal.

-- Advertising --
Photo: CTTO

Sa taho sa Butuan City Police Station kon BCPS-4, misumbong ang maguwang sa usa sa mga biktima sa illegal recruitment nga gihimo sa suspek kinsa mipasalig sa mga biktima nga makasulod ug mapa-ilalom sila sa training sa Philippine Army.

Dinhi gilayon gihimo ang entrapment operation nga miresulta sa pagka-rescue sa walo ka mga biktima nga kasagari taga-Agusan del Sur.

Nasuta nga ang maong suspek naka-recruit usab og tulo ka indibidwal adtong Enero 13 ug gipapundo sa usa ka panimalay sa Purok 6, Ambangan, Brgy. Libertad ning syudad.