BUTUAN CITY – Gikumpirma ni Major Francisco Garello Jr., tigpamaba sa 4th Infantry ‘Diamond’ Division nga anaa na sa lokal nga kagamhanan sa Impasug-ong, Bukidnon ang urns ni George Madlos alyas Ka Oris uban sa iyang medical aid.

Sa eksklusibong interview sa Bombo Radyo Butuan, gipadayag ni Major Garello nga gihulat na lang sa Impasug-ong LGU ang mga kabanay sa duruha aron kuhaon ang ilang urns.

Madumdumang gi-cremate ang patay’ng lawas sa duruha human matud pa nagpositibo sa COVID-19 ug isip pagsunod na usab sa health protocols sa Inter-Agency Task Force for the Management of Emerging Infectious Disease.  

Subli usab nga giklaro ni Major Garello nga namatay sa engkwentro sila Ka Oris sukwahi sa gipasi-atab matud pa sa mga ka-ubanan niining gipatay sila samtang sakay sa motorsiklo aron unta matud pa magpa-check up.  

Sa pagkakaron, nahatagan matud pa og hustisya sa kagamhanan ang mga nabiktima sa terorismong kalihukan nga gisabwag nila Ka Oris sa dugay nang katu-igan.

-- ADVERTISEMENT --

Panawagan sa opisyal ngadto sa uban pang anaa sa kalihukan nga mas maayong mutahan na sila aron dili nila madangatan ang nadangatan ni ka Oris ug sa uban pang mga rebeldeng NPA nga namatay sa engkwentro.

Magpadayon pa gihapon ang ilang military operations bisan pa man sa kamatayon ni Ka Oris hangtud nga hingpit nang mabuntog ang ilang kalihukan ug makabalik na sa sabakan sa balaud ang tanan nilang mga membro.

Andam usab matud pang hatagan og saktong away sa tropa sa gobyerno ang mg rebeldeng grupo.