BUTUAN CITY – Upat ka mga Butuanon nga nakadawat og radio set gikan sa Radio Mindanao Network kon RMN nga gituli sa ila lang sibyahan, ang misurender niini dinhi sa Bombo Radyo kaganina.

Kini human nila nasayran gikan sa ilang mga silingan nga ang maong klase sa mga radyo, ilisdan sa Bombo Radyo ug bag-ong radio set aron ilang ma-exercise ang ilang katungod nga gawasnong makapaminaw sa radio station nga gusto nilang paminawon.

Unang misurender sa iyang nadawat  nga radyo nga duna pa’y gipilit nga sticker sa DXBC si Virgie Desiata nga taga-Brgy. Golden Ribbon human niya nasayrang mahimo kining pabayluan ug chargeable radio nga duna pa’y built-in nga flashlight.

Dako ang iyang pagpasalamat nga sa katapusan, makapaminaw na siya og lain pang mga radio stations tungod kay taud-taud na matud pa kining gihatag kaniya.

Misamot ang iyang kalipay nga nahatagan usab siya og 3-mil pesos nga sayong Pinaskuhan isip dugang pahalipay nga iya matud pang mapalit sa panginahanglanon sa ilang panimalay.

-- ADVERTISEMENT --

Sunod nga misurender sa tinuli nga radyong gikan sa RMN ang silingan ni Desiata nga si Ruth Balagon nga taga-Purok Sibuyas kinsa nagbutyag nga duha ka tuig na matud pa kaniya ang maong radyo.

Dako ang iyang kalipay nga nakadawat siya og bag-ong radio set nga duna’y AM ug FM dial aron makapili sa sibyahan nga gusto niyang paminawan.

Misamot ang iyang kalipay dihang nadawat ang pakapin nga 3-mil pesos nga maoy nakapahangak sa iyang ginhawa dihang gi-ihap niya kini.