BUTUAN CITY – Nakatala og upat ka mga bag-ong patay ug 72 ka mga bag-ong kaso sa COVID-19 ang Caraga Region kondiin sa maong ihap, 48 ang mga lalaki samtang 24 usab ang mga babaye ug 67-porsiento kanila anaa sa edad nga 11 ngadto sa 40-anyos.
Sa maong ihap usab, 47 ka mga kaso ang natala sa Agusan del Sur kondiin 35 sa mga niini anaa sa lungsod sa Prosperidad, 9 sa San Francisco ug tag-usa na sa mga lungsod sa Bunawan, Sta. Josefa ug Trento ug lahi pa ang usa ka kaso sa Brgy. Poblacion sa Bayugan City sa susamang lalawigan.
Nakatala usab og 10 ka mga kaso ang lalawigan sa Surigao del Sur kondiin nakatala og tag-tulo ka mga kaso ang mga lungsod sa Carmen ug Carrascal; 2 sa Tago ug tag-usa sa mga lungsod sa Lianga ug Madrid ug lima ka mga kaso usab ang natala sa Tandag City sa susamang lalawigan nga nabahin sa Brgy. Telaje-4 ug usa sa Brgy. San Agustin.
Samtang 9 ka mga kaso usab ang natala dinhi sa dakbayan sa Butuan kondiin tag-duha ka mga kaso ang natala sa Brgy. Bancasi, Basag ug Dagohoy, samtang tag-usa sa Brgy. Bonbon, Libertad ug Sumilijon.
Samtang ang mga namatay gilangkuban sa usa ka 54-anyos nga lalaki gikan sa Bayugan City kinsa hypertensive, diabetic, ug duna’y large enlargement kinsa gidala sa ospital niadtong Disyembre 31 ning mi-aging tuig tungod sa paglisod sa pagginhawa apan namatay sa unang adlaw sa bag-ong tuig 2021.
Ang ikaduhang namatay mao ang usa ka 64-anyos nga lola nga gikan sa Sta. Josefa, Agusan del Sur nga duna’y sakit sa tiyan, gi-ubo ug naglisod pagginhawa niadtong Disyembre 30 ug gidala sa ospital niadtong Enero 2 apan gideklarang dead-on-arrival sa attending physician.
Samtang ang ikatulong namatay mao ang usa ka 81-anyos nga lola nga gikan sa Tandag City nga wala’y comorbidity, gi-admit niadtong Disyembre 17 tungod sa iyang ubo ug lisod nga p;agginhawa apan tungod sa mga komplikasyon, namatay sa Enero 1 ning tuiga ug ang ika-upat nga nakalas mao ang 44-anyos nga taga-San Francisco, Agusan del Sur kinsa wala’y comorbidity apan gi-admit niadtong Disyembre 29 human naglisod pagginhawa apan tungod sa mga komplikasyon, namatay niadtong Enero 3.
Sa kinatibuk-an, mi-abot na sa 4,826 ang kinatibuk-ang COVID-19 positives ning rehiyon kondiin 461 pa ang mga aktibong kaso, 4,148 ang mga nakarekober ug 217 na ang nakalas.
