BUTUAN CITY – Upat ang natalang patay karong adlawa dinhi sa Caraga Region tungod sa COVID-19 dungan sa natala usab nga 38 ka mga bag-ong kaso kondiin 21 niini ang mga lalaki samtang 17 ang mga babaye ug 55-porsiento ang anaa sa age bracket nga 21 hangtud 50-anyos.

Sa maong ihap, pinakadaghan ang natala sa Agusan del Sur nga mi-abot sa 19 kondiin pito niini anaa sa lungsod sa Bunawan, San Luis-6, Rosario-3 samtang tag-usa usab sa mga lungsod sa Prosepridad, San Francisco ug Trento.

-- Advertising --

Pito ang natala sa Butuan City nga na-apod sa Brgy. Ambago ug Libertad nga duna’y tag-duha, samtang tag-usa sa Brgy. Lapu-Lapu, Tandang Sora ug Villa Kananga samtang mitala usab og tag-duha ka mga kaso ang Agusan del Norte kondiin tag-usa ang natala sa mga lungsod sa Nasipit ug Jabonga ingon man sa Brgy. Poblacion, Bayugan City. Surigao City nga nabahin sa Brgy. Bonifacio ug Washington ingon man sa lungsod sa Carrascal, Surigao del Sur samtang usa ka kaso ang natala sa Brgy. Rosario, Tandag City.

Sa 38 ka mga bag-ong kaso, 34 kanila ang gi-quarantine na, gi-monitor ug gi-atiman og maayo samtang upat usab ang namatay kondiin apil sa namatay ang usa ka 72-anyos nga babayeng taga-Butuan kinsa wala’y comorbidity apan gi-ubo, naglisod pagginhawa niadtong Disyembre 12 ug na-admit paglabay sa duha ka mga adlaw apan namatay sa susamang adlaw.

Ang ikaduhang namatay usab mao ang 84-anyos nga lalaking taga-Jabonga, Agusan del Norte kinsa hypertensive, diabetic ug duna’y sakit sa baga. Gihilantan siya, gi-ubo ug naglisod og ginhawa niadtong Disyembre 7 rason nga gi-admit pagka-ugma apan namatay sa susamang adlaw.

Ang ikatulong kaso mao ang usa ka 35-anyos nga lalaking taga-Bayugan City nga duna’y sakit sa kasing-kasing ug atay kinsa gilabdan og ulo ug naglisod pagginhawa niadtong Disyembre 10 ug gi-admit pagka-Disyembre 11 apan namatay sa Disyembre 12 samtang ang ika-upat nga namatay mao ang 22-anyos nga lalaking taga-Bunawan, Agusan del Sur kinsa gisakitan lang og tiyan ug naglisod pagginhawa pagka-Nobyembre 30 na-admit pagka-Disyembre 12 apan namatay pagkasunod adlaw.

Sa pagkakaron, ang kinatibuk-ang patay tungod sa COVID-19 mi-abot na sa 194 samtang 4,213 usab ang cumulative COVID-19 confirmed cases apan 467 na lang ang padayong nagpa-ayo human nga nakarekober na ang 3,552.