BUTUAN CITY – Nakatala og upat ka mga patay ang Caraga Region tungod sa COVID-19 samtang laing 51 ang bag-ong kaso base sa pinaka-ulahing COVID-19 situational report sa Department of Health-Center for Health and Development kon DOH-CHD Caraga.

Sa ilang virtual presser, apil sa namatay ang usa ka 30-anyos nga babayeng taga-Socorro, Surigao del Norte kinsa wala’y comorbidity apan gl-admit niadtong Disyembre 31 tungod sa lisod nga pagginhawa apan namatay sa susamang adlaw.

-- Advertising --

Gisundan kini sa usa ka 96-anyos nga lolong taga-Marihatag, Surigao del Sur kinsa hypertensive ug gi-ubo hangtud nga nakasinati og punga nga gininhawa niadtong Disyembre 2 rason nga gi-admit pagkasunod adlaw apan tungod sa komplikasyon namatay pagka-Disyembre 11.

Ikatulo ang usa ka 67-anyos nga lolang taga-Tandag City kinsa wala’y comorbidity apan naglisod pagginhawa niadtong Disyembre 15 rason nga gi-admit pagka-18 apan namatayu sa mismong adlaw sa Pasko samtang ang ika-upat nga nakalas mao ang 40-anyos nga babayeng tga-Socorro, Surigao del Norte gihapon kinsa hypertensive, na-stroke ug duna’y problema sa kasing-kasing, gi-ubo ug naluya ang tuong parte sa iyang lawas rason nga gidala sa usa ka health facility apan namatay niadtong Enero 3.

Ang tipik sa virtual announcement sa DOH-Caraga. Samtang sa 52 ka mga bag-ong kaso, 32 niini ang mga babaye samtang 19 ang mga lalaki ug 65-porsiento ang anaa sa age bracket nga 21 hangtud 50-anyos.

Nakatala og 19 ka mga kaso ang Agusan del Sur nga na-apod sa 13 ka mga kaso sa Prosperidad, 3 sa San Francisco, ug tag-usa na sa mga lungsod sa Rosario, Sibagat ug Talacogon.

Walo ka mga kaso usab ang natala sa Surigao del Norte nga nabahin sa tulo ka mga kaso sa lungsod sa Placer ug tag-usa na sa mga lungsod sa Dapa, Gigaquit, San Benito, San Francisco ug Socorro.

Upat ka mga kaso usab ang natala sa Surigao City kondiin tulo niini anaa sa Brgy. Taft ug usa sa Washington samtang 13 ka mga kaso usab sa Surigao del Sur nga na-apod sa 5 ka mga kaso sa lungsod sa Lianga, 4 sa Carrascal, 2 sa Barobo ug tag-usa sa Cantilan ug Lanuza ug 7 ka mga kaso ang natala sa Butuan City partikular sa Brgy. Holy Redeemer ug San Vicente nga duna’y tag-duha ug tag-usa na sa Brgy. Agao, Ampayon ug Lapu-lapu.