BUTUAN CITY – Nakatala og 38 ka mga bag-ong COVID-19 cases ang Department of Health-Center for Health and Development kon DOH-CHD Caraga ingon man usa ka bag-ong patay base sa ilang gilusad nga virtual presser kaganina.

Ang bag-ong patay mao ang 85-anyos nga lola sa San Agustin, Surigao del Sur kinsa diabetic ug gihilantan, gi-ubo ug naglisod sa pagginhawa niadtong Disyembre 14 ug gi-admit pagka-Disyembre 18 apan namatay sa susamang adlaw.

-- Advertising --

Sa mga bag-ong kaso usab, 22 niini ang mga lalaki samang 16 usab ang mga babaye ug 74-porsiento kanila ang anaa sa edad nga 21 hangtud 50-anyos.

Pinakadaghan niini ang natala sa Agusan del Sur nga mi-abot sa 18 ka mga kaso nga na-apod sa lungsod sa Prosperidad-12; San Francisco -3, Trento-2 ug usa sa Rosario.

Upat ang natala sa Agusan del Norte kondiin duha niini taga-Buenvista ug tag-usa sa Kitcharao ug Tubay. Tagduha usab ang natala sa Sison, Surigao del Norte ingon man sa Washington, Surigao City samtang usa ang natala sa Brgy. Del Pilar sa Cabadfbaran City; ug unom dinhi sa dakbayan sa Butuan nga na-apod sa upat ka mga kaso sa Brgy. Villa Kanangan ug tag-usa sa Brgy. Libertad ug San Vicente.

Sa kasamtangan, mi-abot na sa 4,349 ang cumulative COVID-19 cases sa entiro rehiyon kondiin 454 ang mga aktibong kaso, 3,697 usab ang nakarekober ug 198 na ang kinatibuk-ang patay.