BUTUAN CITY – Narekober na sa mga divers ug mga rescuers sa Cabadbaran City lalawigan sa Agusan del Norte, ang tulo sa upat ka mga batang nalumos sa Cabadbaran River kagahapon sa hapon sa may SItio Dal-as, Purok 8, Brgy. Mabini kondiin ang mga narekober pulos mga managsoon.

Sigon ni Mabini Brgy. Kagawad Riza Jamboy, unang nakit-an kagahapon si Realyn Emberda, 9-anyos ug kaganina ang mga igsoon niining sila Erlyn Emberda, 11-anyos ug Reynald Emberda, 14-anyos samtang gipangita pa ang ilang ig-agaw nga si Aron James Suhaya, 11-anyos.

-- Advertising --
Photo: CTTO

Sa eksklusibong interview sa Bombo Radyo Butuan, gibutyag ni Kagawad Jamboy nga andam silang muhatag og ayuda ngadto sa pamilya sa mga biktima ilabina nga indigent ang hingtungdang pamilya.

Una ang gibutyag ni PMajor Renel Serrano, hepe sa Cabadbaran City Police Station sa eksklusibong pakighinabi ning sibyahan nga namasol matud pa ang mga biktima apan dihang wala’y ayo ang ilang pagpamasol, mi-aksyon kini pagtabok sa pikas tampi apan diha pa lang sa tunga-tungang bahin sa suba, gi-anod na sila sa kusog nga bul-og sa tubig baha.

Photo: CTTO

Posibleng wala na nila makaya ang pagtabok tungod sa mga anod nga mga kahoy nga uban sa tubig-baha hinungdan sa hingpit nilang pagka-anod.