BUTUAN CITY – Nagpadayon karon ang hot pursuit operations sa 29th Infantry ‘Matatag’ Battalion sa nanibat nga mga rebeldeng New People’s Army human gi-atake pasado alas-2:30 kaganinang tungang gabii ang 29th IB Squad nga duna’y 7 ka mga mga sundalo ug 3 ka mga Civilian Active Auxiliary kon CAA members nga gipangunahan ni Sgt. Galarita.

Nahitabo ang pag-atake samtang gibantayan sa tropa sa kagamhanan ang nagpadayong farm to market road construction project sa Brgy Maraiging, Jabonga, Agusan del Norte.

Ang maong pagsulong miresulta sa pagkamatay  sa tulo ka mga sundalo ug usa ka CAA member ingon man pagkasikop sa tulo ka mga rebeldeng NPA nga nailang sila Renan Bago alyas Ka Justin kinsa nasamdan, Andre Pinao ug Tungan Lauro  kinsa nakuhaan usab og usa ka M16 armalite rifle.

Sa eksklusibong interview sa Bombo Radyo Butuan, gipadayag ni 2nd Lt. Roselyn Matulac nga nagpakita lang ang NPA sa ila matud pang pagka-terorista tungod kay mihimo gihapon sila pag-atake taliwa nga anaa sulod sa komunidad ang lokasyon sa maong proyekto.

-- Advertisement --