BUTUAN CITY – Nakatala na usab karon og tulo ka patay ug 57 ka mga bag-ong kaso sa COVID-19 ang Caraga Region rason nga sa kinatibuk-an, duna na kita’y 5,012 nga cumulative COVID-29 cases kondiin 542 pa ang aktibong kaso samtang 4,246 ang mga nakarekober ug 224 na ang kinatibuk-ang patay.

Apil sa pinaka-ulahing namatay ang usa ka 56-anyos nga lalaking tag-San Francisco, Agusan del Sur kinsa hypertensive, gi-ubo ug naglisod pagginhawa niadtong Disyembre 27 rason nga gi-admit niadtong Enero 3 apan tungod sa mga komplikasyon, namatay pagka-Enero 6.

-- Advertising --

Ang ikaduha mao ang usa ka 58-anyos nga lalaking taga-Tubod, Surigao del Norte kinsa wala’y comorbidity, na-admit adtong 3 Kings day tungod sa paglisod niya og ginhawa apan namatay pagka-ugma samtang ang ikatulo mao ang usa ka 69-anyos nga lolang taga-Lanuza, Surigao del Sur kinsa diabetic, unang gihilantan, gi-ubo, naglisod og ginhawa hangtud nga naluya niadtong Disyembre 29 ug sa Enero 4 pa gidala sa ospital apan wala na kini maka-abot pang buhi.

Ang tipik sa virtual announcement sa DOH-Caraga. Samtang sa mga bag-ong kaso, pinakadaghan niini ang lalawigan sa Agusan del Sur nga mi-abot sa 35 kondiin 13 ang natala sa lungsod sa Bunawan, 18 sa Rosario, taglima sa Prosperidad ug San Francisco, 3 sa Talacogon ug 1 sa Trento.

Unom ka mga kaso usab ang natala sa Surigao del Norte nga na-apod sa tag-usa sa mga lungsod sa Alegria, Placer, San Benito, Sison, Socorro ug Tubod samtang tag-lima usab ang natala sa Surigao del Sur ug Butuan, 2 sa Surigao City ug tag-usa sa Bislig City, Agusan del Norte ug Tandag City.