BUTUAN CITY – Giklaro ni Ka Leo De Guerro, nagpa-ilang tigpamaba sa New People’s Army kon NPA-Surigao del Norte nga dili matud pa mga rebelde ang duha nga gibutyag sa militar nga napatay atol sa ilang 25-minutos nga engkwentro sa bukirang bahin sa Sitio Pan-ukan, Brgy. Cambuayon, Bacuag, Surigao del Norte ning mi-aging alas-tres sa hapon.

Sa eksklusibong pakighinabi sa Bombo Radyo Butuan, gi-ila ni Ka Leo ang mga namatay nga sila Richard ‘Titing’ Lampad, 40-anyos ug Ronald Bestajo, 40-anyos, parehong taga-Brgy. Pautao sa maong lungsod samtang anaa sa kritikal nga kahimtang si Benjie Bestajo, 40 anyos, residente sa Brgy. Cambuayon ug nadakpan usab si Julieto Madelo, 37-anyos, residente sa Brgy. Pautao ug nabilanggo sa Bacuag Municipal Police Station.

-- Advertising --

Sigon ni Ka Leo, pulos matud pa mga agsa ang upat kon mga nagtrabaho sa koprasan kondiin sila ang magproseso sa kopras ug ang kita kuhaan sa ilang gasto samtang ang sobra maoy bahinon.

Nag-sacking na matud pa sila aron unta ikarga na pagkasunod adlaw ang ilang mga kopras dihang kalit lang matud pa silang gipa-arakan sa mga sakop sa 30th Infantry Battalion, Philippine Army taliwa nga misinggit na matud pa silang mga sibilyan lang sila nga mga mag-uuma.

Ang narekober matud pa sa militar nga mga armas, ila kadto sa ilang mga ka-ubanan nga misusi pagkasunod adlaw kon kagahapon sa buntag kung unsa ang mga buto-buto, apan gipa-arakan sa mga sudalo rason sa ilang pagsibat hinungdan nga nabilin ang mga gamit panggiyera.

Samtang wala na makurat pa si Captain Joash Pramis, tigpamaba sa 901st Brigade, Philippine Army sa gipasi-atab ni Ka Leo De Guerro.

Sa eksklusibong pakighinabi sa Bombo Radyo Butuan, gipadayag niining dili ang kini ang unang higayon nga gihimo kini sa rebeldeng grupo, matag-higayong duna sila’y ka-ubanang makalas.

Ang angayan matud pang huna-hunaon sa tanan ilabina sa publiko mao kung kinsa ang nanag-iya sa mga narekober nilang war materials human sa engkwentro.

Kung ipamugos matud pa nga mga sibilyan ang mga nakalas, na-angol ug nadakpan, angayan usab nga ipasabot sa mga kabanay niini kung nganong anaa sila sa lugar diin narekober ang mga armas.