BUTUAN CITY – Padayon pang gi-ila ang identity sa duha ka mga sakop sa rebeldeng New People’s Army kon NPA nga napatay sa engkwentro tali sa 36th Infantry ‘Valor’ Battalion sa bukirang bahin sa Sitio Agsam, Brgy Cabas-an, lungsod sa Cantilan, Surigao del Sur ning mi-aging alas-5:15 sa hapon. 

Nakadawat matud pa og impormasyon ang kasundaluhan gikan sa mga residente kalabot sa pagpangilkil sa mga rebelde ug pagbahad kanila hinungdan nga dali kining girespondehan sa kasundaluhan pinaagi sa gilusad nilang combat operation.

Milungtad og 10-minutos ang engkwentro tali sa gibana-banang 10 usab ka mga rebeldeng gitu-uhang mga sakop sa Platoon 2, Guerilla Front (GF30) ubos kang Noel Tumarlas Alacre kinsa naila usab sa alyas nga Megan.

Daling nanibat sa managlahing direksyon ang nagkatibulaag na nga mga rebelde biniyaan ang ilang mga angol nga ka-ubanan. 

Narekober sa militar ang duha ka mga patay’ng lawas uban sa tag-usa ka M16-A1 rifle, AR18 rifle, carbine, apil na ang usa ka bandolier nga duna’y duha ka mga tag-as nga long magazines ug usa ka short magazine sa M16, upat ka backpacks, duha ka mga selpon, medical paraphernalia, personal nga mgga gamit ug mga subersibong dokumento.

-- ADVERTISEMENT --

Sigon ni LCol Michael Rey Reuyan, acting Commanding Officer sa 36th IB, gi-turn-over na nila ngadto sa PNP ug sa hingtungdang local government units ang mga patay’ng lawas aron sila ma-ilhan ug mapa-ilalom sa post-mortem examination.

Photo: CTTO