BUTUAN CITY – Duha ka mga regular members sa mga rebeldeng New Peoples’ Army kon NPA ang boluntaryong mitahan ngadto sa mga elemento sa Charlie Company, sa 26th Infantry (Ever Onward) Battalion, nga nakabase sa lungsod sa Loreto, Agusan del Sur.

 
Naila ang mga mitahan nga sila alyas Jonel, 33-anyos og alyas Rustom, 16-anyos, parehong sakop sa Abe Team, Segunda Squad, Pulang Bagani Command kon PBC-4, sa Southern Mindanao Regional Committee kon SMRC nga nag-operate mga utlanan sa lungsod sa Loreto, Agusan del Sur og Laak, Comval Province.

 
Bitbit ni Jonel sa iyang pagtahan ang iyang AK 47 rifle n ga duna’ya usa ka magazine og 40 ka mga buhing bala samtang bitbit usab ni Rustom ang usa ka sub-machine gun uban sa usa ka magazine og pito ka mga buhing bala sa kalibre punto 38 nga revolver.

 
Atol sa debriefing, gipadayag ni Rustom nga gidagit siya sa mga rebelde dihang nakit-an siya sa lasang og pugsanong gidala usa ka hideout sa kalsangan sa Brgy. San Mariano, lungsod sa Loreto.

 
Kanunay na matud pa siyang nananghid nga mupa-uli una apan dili siya tugutan nila alyas Tula og alyas Jordan, dayong mando nga dili mubiya kung wala kini balidong rason.

-- ADVERTISEMENT --

 
Gibutang gilayon siya sa platoon nga balik-balik nga nag-operate sa provincial boundary sulod sa tulo ka mga buwan.
Gi-isyuhan matud pa siya og usa ka M16 rifle paglabay sa usa ka buwan og tunga dihang naka-engkwentro sa grupong iyang gisudlan ang mga sakop sa 26th IB resulta sa pagkarekober sa tropa sa kagamhanan og usa ka AK 47 og dinhi na siya nagplanong musibat og nagdesisyon pagtahan.

 
Gikostudiya na si Rustom sa Provincial Social Welfare and Development (PSWD) alang sa case management og tukmang intervention, samtang si Jonel mipa-ilalom na sa custodial debriefing subay na sa ilang E-CLIP Enrollment, kondiin makadawat sila og psychosocial interventions, financial og livelihood assistance ingon man firearms remunerations alang sa ilang gitahan nga mga armas.

 
Ilang gibutyag nga ang kakulang nila sa pagkaon og katulog apil na ang tumang kalisod mao ang nag-unang rason sa ilang pagtahan human ang engkwentro batuk sa mga sakop sa 26th IB, Philippine Army ning mi-aging buwan didto sa Kauswagan, lungsod sa Loreto. (Beth Ruiz)