BUTUAN CIY – Human nakatala og duha ka patay ning mi-aging adlaw ang Caraga Region tungod sa COVID-19, susamang ihap na usab ang natala ning rehiyon sa pinaka-ulahing virtual report sa Department of Health-Center for Health and Development kon DOH-CHD-Caraga samtang 49 ang bag-ong kumpirmadong kaso.

Apil sa nadugang sa mga namatay ang 84-anyos nga lola nga taga-Rosario, Agusan del Sur kinsa hypertensive, gi-ubo ug naglisod og ginhawa niadtong Disyembre 24, gi-admit sa Disyembre 27 ug namatay pagkasunod adlaw samtang ang ikaduhang namatay mao ang 71-ayos nga lolo sa San Miguel, Surigao del Sur nga wala’y comorbidity apan gi-ubo og naglisod pagginhawa niadtong Disyembre 21 rason nga gi-admit pagka-ugma apan namatay kagahapon tungod sa mga komplikasyon.

-- Advertising --

Sa mga bag-ong kaso usab, 40 niini pulos taga-Agusan del Sur nga gilangkuban sa 22 ka mga kaso sa lungsod sa Prosperidad, 14 sa Rosario, 3 sa San Francisco ug usa sa San Luis.

Usa ka kaso ang natala sa Brgy. Poblacion, Bayugan City nga sakop gihapon sa Agusan del Sur, 2 ka mga kaso sa Surigao del Norte nga gikan sa mga lungsod sa Claver ug Dapa nga duna’y tag-usa; ug upat ka mga kaso Surigao City nga na-apod sa tag-usa sa Brgy. Ipil, Luna, Togbongon ug Washington ug 2 ka mga kaso usab sa Carmen, Surigao del Sur samtang wala’y natala dinhi sa dakbayan sa Butuan, lalawigan sa Agusan del Norte ug sa Dinagat Islands province.

Samtang 31 sa bag-ong ihap mga lalaki ug 18 ang mga babaye ug 67-porsiento ang anaa sa edad nga 11 ngadto sa 40-anyos.