BAGUIO CITY – Natiliw ti maysa a wanted person a maatap a nangpalpaltog iti maysa a residente ti Rizal, Kalinga iti naipatungpal a manhunt operation sadiay Purok 1, Palale, General Tinio, Nueva Ecija idi kalman.

Nabigbig daytoy a ni Joey Palaleo Dao-as, 40-anyos, residente ti General Tinio, Nueva Ecija ken nakalista a maikadua iti Top Ten Most Wanted Person sadiay Rizal, Kalinga iti maikatlo a kwarter ti agdama a tawen.

-- Advertisement --

Naakusaran daytoy a kangrunaan a suspek iti pammaltog sadiay Calaocan, Rizal a napasamak idi September 23, 2005, no sadino, maatap a pinalpaltoganna ti biktima nga awanan ti umno a rason babaen iti homemade 12 gauge shotgun.

Natiliw daytoy kalpasan a naglemmeng manipud iti ima ti linteg iti las-ud ti nasurok 16 a tawen kasaruno ti panangiserbi dagiti otoridad iti warrant of arrest daytoy nga impaulog ti korte sadiay Tabuk City, Kalinga.

Narekomendaran daytoy ti piansa a P200,000 ken iti agdama ket adda paylaeng daytoy iti kustodiya ti pulisya sadiay Rizal, Kalinga.