BAGUIO CITY – Naituding a maangay inton Hunyo 4, ti agdama a tawen ti virtual a konsultasion iti publiko seknan iti kontrobersial a singasing a panakanayon ti operasion ti e-bingo ken dadduma oay a pasugal nga otorisado ti PAGCOR ditoy Baguio City.

Gapu iti daytoy, ibalbalakad ti Committee Chair on Market, Trade and Commerce, and Agriculture a ni Councilor Philian Weygan Allan ti panakipaset ti publiko, nangruna iti opisision, tapno idanonda ti pakaseknanda iti nasao nga isyu.

-- Advertisement --

Iti panakiyuman ti Bombo Radyo Baguio, kinuna ti konsehal kas maibasar iti panakipatangda kadagiti nagduduma a sektor nga ado ti saan nga umanamong a manayonan ti bilang dagiti agop-operate nga e-bingo ditoy lokalidad.

Pakairamanan ditoy ti sektor ti simbaan, grupo dagiti babbai , ti multi-sectoral group ken dadduma pay.

Immuna iti daytoy, naipasa iti lokal a konseho ti dua a resolusion a mangkidkiddaw iti panakaipalubos ti e-bingo ditoy Baguio City ngem imbasura ni Mayor Benjamin Magalong.

Nupay kasta, naamuan a maikagkagumaan latta a maipasa daytoy iti konseho kalpasan a naisubli ti nasao a resolusion gaputta mamati dagiti dadduma a konsehal a makatulong ti e-bingo iti panagdur-as ti turismo ken ekonomiya ti siudad.

Impetteng met ti oposision a dakkel ti dakes nga epekto daytoy iti aspet ti pinansial, moral ken iti relihion.

Committee Chair on Market, Trade and Commerce, and Agriculture a ni Councilor Philian Weygan Allan

Immuna metten nga impaganetget ni chairman ti Committee on Laws Councilor Betty Lourdes Tabanda ti saanna a panangaprobar iti kiddaw ti RCC Global Entertainment Inc. a mangimuntar ken mangpataray iti electronic ken traditional bingo ken dadduma pay a pasugal nga otorisado ti PAGCOR ditoy siudad.