-- ADVERTISEMENT --

BAGUIO CITY – Naipaiman iti maseknan a pamilya ti bangkay ti rebelde a kameng ti New People’s Army (NPA) a napapatay iti napasamak nga engkwentro iti nagbaetanda iti tropa ti gobyerno sadiay Bagtayan, Pasil, Kalinga idi Sabado, November 13, 2021.

Nabigbig daytoy a ni Julio Dumalyong alias Ka Poli manipud Tanglag, Lubuagan, Kalinga.

Immuna iti daytoy, kinuna ti militar a nangipatulodda ti 10 a soldado sadiay Bagtayan tapnu mangisayangkat ti combat operation tapnu beripikaren ti report mainaig iti presensia dagiti armado a lallaki sadiay nga agkidkiddaw ti taraon ken no mamingsan ket kwarta manipud kadagiti umili.

Bayat ti panagpatrolya dagiti soldado, nadiskobreda ti temporaryo a pagkamkampuan dagiti rebelde a mapapati a kameng ti Platun Guevarra ti KLG BAGGAS ti NPA.

Kabayatan ti panagsawar dagiti soldado ket pinalpaltogan dagitoy dagiti rebelde a nagresulta ti engkwentro.

-- ADVERTISEMENT --

Pimmaut ti engkwentro iti agarup 35 a minutos sakbay a nagsanod ken naglibas dagiti agarup 15 a rebelde.

Nupay kasta, imbati dagitoy ti bangkay ni Dumalyong.

Patien pay ti militar nga adda dagiti dadduma a rebelde a nadangran gapu iti nakita a dara iti nakapasamakan ti engkwentro.

Nadiskobre ken nakumpiskar manipud iti kampo dagiti rebelde ti maysa nga M16 rifle, dua a magazines, 25 a bala ti 5.53mm, bandolier, transistor radio, personal ken subersibo a kagawaan.

Impeksa met ti militar ti panagyamanda iti komunidad iti panakitinnulong dagitoy iti gobyerno para iti panakaparamek ti insurhensia.

Impasiguradoda nga awan ti pagbutngan dagiti umili iti panangireport dagitoy iti presensia dagiti NPA iti komunidadda gaputa maipasigurado ti panakaidulin ti pakabigbiganda ken ti kinatalged dagitoy.

Immuna metten nga iyulit-ulit ti militar ti panagawisda kadagiti nabatbati a rebelde iti panagsubli dagitoy iti sidong ti gobyerno tapnu agnumarda kadagiti tulong ken maipaayanda ti gundaway a mangabaruanan.