BAGUIO CITY – Nangbukel ti pulisya iti Special Investigation Task Group a mangimbestigar iti panakapapatay ti maysa a kapitan sadiay Bangued, Abra idi kalman.

Immunan a nabigbig ti biktima a ni Robert Villastiqui, kapitan ti Barangay Lubong, Bangued, Abra.

-- Advertisement --

Mangnamnama ti Bangued Municipal Police Station ket mapapartak ti panakarisut ti kaso.

Maibasar iti report ti pulisya, apan kuma gumatang ti biktima iti sigarilyo idi pinalpaltogan daytoy ti saan pay a nabigbig a suspek a nakasuot ti suspek iti nalabbaga a long sleeve, nangisit a short pants ken naka-kallugong.

Mapapati nga M16 armalite rifle ken caliber 45 ti inaramat ti suspek a nangpalpaltog iti biktima kas maibasar kadagiti basyo dagiti bala a naala iti crime scene.

Naduktalan pay iti inisyal nga imbestigasyon ti pulisya a posible a kinamat ti suspek ti biktima ken inalana ti paltog ti biktima a caliber 45.

Nagsagrap ti kapitan iti sumagmamano a tama ti bala ti paltog iti nagduduma a paset ti bagi daytoy a nangitunda iti dagus nga ipupusayna.

Hustisya met ti kiddaw ti pamilya ti biktima.