-- ADVERTISEMENT --

BAGUIO CITY – Inwaragawag ti Department of Agriculture (DA) – Cordillera ti rason no apay a nakastrek ti African Swine Fever (ASF) virus iti probinsia ti Benguet partikular sadiay Camp 1, Tuba ken sadiay Beckel, La Trinidad.

Naduktalan iti imbestigasyon ti DA-Cordillera a gimmatang ti maseknan a hog raiser sadiay Beckel, La Trinidad iti baboy babaen iti online.

Naamuan a nagtaud ti ginatang daytoy a baboy iti probinsia nga immunan a naapektaran iti ASF virus.

Kabayatana, inaklon met ti maseknan a hog raiser sadiay Camp 1, Tuba a pakpakanenna iti arasaw wenno dagiti natedda a taraon dagiti tarakena a baboy.

Immunan a dinakamat ti mayor ti Baguio nga agtataud iti kadakkelan a panganan ditoy siudad dagiti arasaw nga ipakpakan ti nasao a hog raiser kadagiti taraken daytoy.

-- ADVERTISEMENT --

Immunan nga inyunay-unay ti DA a saan a rumbeng a pakanen dagiti taraken a baboy kadagiti arasaw gaputa agbalin laeng a vulnerable dagiti baboy iti ASF virus.

Maipalagip a nasurok 220 ti napapatay a baboy sadiay La Trinidad ken Tuba kalpasan a nagpositibo dagitoy iti ASF virus.